UDIN – Une serade di musiche di cualitât e fate in Friûl! Chest an Suns Europe, festival des arts in lenghe minorizade – inmaneât de cooperative Informazione Friulana cu la poie finanziarie de Regjon Friûl V.J. e de Agjenzie Regjonâl pe Lenghe Furlane (ARLeF) -, si vierç cuntune biele novitât: Suns Friûl, vitrine dedicade aes gnovis produzions musicâls furlanis dal moment! L’apontament al è tal cûr di Udin. Sul palc di place Venerio, sabide ai 22 di Avost, a nûf di sere (21.00), a sunaran i Corte di Lunas cul lôr epic folk inmagant; i Brût & Madone, bandiere dal metal core furlan; Alvise Nodale, erêt de cjançon di autôr cjargnele; i Dissociative TV cuntun punk rock dut batarie e ghitare eletriche; e i Ostajki che a rivin de Slavie furlane e de alte valade dal Lusinç. Parons di cjase a saran Raffaele Serafini e Serena Fogolini, animadôrs de Ostarie leterarie in rêt ConteCurte, che a presentaran i ospits. Tal rispiet des regulis par fâi cuintri al Covid i puescj a saran limitâts. La jentrade e je sore nuie ma si à di prenotâ sul sît https://www.sunseurope.com/fur/prenotazion/ .

SUNS FRIÛL – Suns Friûl al nas cun chê di cjapâ sù la ereditât dal storic Premi Friûl di Radio Onde Furlane, une farie che e à scuviert, promovût, produsût disinis di grups musicâi e autôrs che a àn savût rignuvî a fonts la musiche furlane de metât dai agns ‘90 a vuê. Mitili FLK, Lino Straulino, Arbe Garbe, Loris Vescovo, Carnicats e Doro Gjat, Luna e Un Quarto, Fabian Riz e DJ Tubet a son juste un pôcs dai artiscj che in gracie dal Premi Friûl e e de etichete Musiche Furlane Fuarte a àn dât un contribût impuartant ae musiche e, plui in gjenerâl, ae creativitât artistiche par furlan e, di chê strade, a dute culture furlane, massime framieç dai plui zovins.

Dopo di vêsi centrade tai ultins agns soredut su la organizazion di Suns Europe, Informazione Friulana e à decidût di recuperâ il spirt dal Premi Friûl metintlu dentri ta cheste suaze gnove. Cemût che a spieghin i organizadôrs: «Propite il rivoc che il festival european al à vût, nus a stiçâts a cjapâ dentri un event che al fasès di vitrine pes miôr produzions musicâls furlanis dal dì di vuê e di risultive di propuestis creativis par Suns Europe».

IL FESTIVAL SUNS EUROPE – inmaneât de cooperative Informazione Friulana cu la poie finanziarie de Regjon autonome Friûl – Vignesie Julie e de ARLeF, Agjenzie Regjonâl pe Lenghe Furlane, e cul jutori dal Comun di Udin e dal Etxepare Euskal Institutua (Paîs Basc) – fin dal principi si à davuelt sot dal patrocini dal Consei de Europe e dal NPLD, Network to Promote Linguistic Diversity, la rêt europeane pe promozion de diversitât linguistiche. Cun di plui al gjolt de colaborazion di cetancj sogjets publics e privâts tant che i Comuns di Dartigne, Listize, Murùs, Puçui e Trep Liussûl, il CEC, Centro Espressioni Cinematografiche, la Societât Filarmoniche di Puçui, e lis associazions Amici del teatro e Cocula. Suns Europe al fâs de citât di Udin une crosere di culturis, lenghis e artiscj, al stice miscliçaments e confronts, al met in evidence une produzion artistiche di grant valôr.

Comunicato stampa

Share This